Azərbaycan Respublikasının gömrük buraxılış məntəqələrindən fiziki şəxslər tərəfindən istehsalat və ya kommersiya fəaliyyəti üçün nəzərdə tutulmayan malların keçirilməsinin qaydaları haqqında Qərar № 81

Azərbaycan Respublikasının Nazirlər Kabineti

Azərbaycan Respublikasının gömrük buraxılış məntəqələrindən fiziki şəxslər tərəfindən istehsalat və ya kommersiya fəaliyyəti üçün nəzərdə tutulmayan malların keçirilməsinin qaydaları haqqında

Qərar № 81

Bakı şəhəri, 21 iyul 1997-ci il

1. «Azərbaycan Respublikasının gömrük buraxılış məntəqələrindən fiziki şəxslər tərəfindən istehsalat və ya kommersiya fəaliyyəti üçün nəzərdə tutulmayan malların keçirilməsi qaydaları» (əlavə № 1), «Azərbaycan Respublikası gömrük buraxılış məntəqzlərindən gömrük rüsumları ödənilmədən müvəqqəti olaraq fiziki şəxslər tərəfindən keçirilən (gətirilən, çıxarılan) malların siyahısı» (əlavə №2) və «Azərbaycan Respublikası ərazisində fiziki şəxslər tərəfindən (beynəlxalq poçt göndərişləri də daxil olmaqla) gətirilən malların hər bir ölçü vahidinə tətbiq edilən gömrük rüsumlarının dərəcələri» (əlavə № 3) təsdiq edilsin.

2. Bu Qərarla təsdiq edilmiş «Azərbaycan Respublikasının gömrük buraxılış məntəqələrindən fiziki şəxslər tərəfindən istehsalat və ya kommersiya fəaliyyəti üçün nəzərdə tutulmayan malların keçirilməsi qaydaları»nda göstərilən gömrük rüsumları, həmin rüsumların ödənilmə gününə ABŞ dollarının Azərbaycan Respublikası Milli Bankının müəyyən etdiyi məzənnə ilə manatla ödənilir.

3. Gömrük rüsumlarının tam həcmdə və vaxtında dövlət büdcəsinə keçirilməsi Dövlət Gömrük Komitəsi və müvəkkil banklar tərəfindən təmin edilsin.

4. Dövlət Gömrük Komitəsi bu qərarın icrası ilə əlaqədar müvafiq təlimatlar hazırlasın, Maliyyə Nazirliyi ilə razılaşdıraraq təsdiq etsin və digər lazımi tədbirlər həyata keçirsin.

5. Azərbaycan Respublikası Nazirlər Kabinetinin 1995-ci il 19 avqust tarixli 184 nömrəli qərarı (7-ci bəndi istisna olmaqla), 1996-cı il 27 mart tarixli 33 nömrəli, 1996-cı il 21 avqust tarixli 114 nömrəli, 1996-cı il 12 dekabr tarixli 173 nömrəli qərarları, 1997-ci il 29 mart tarixli 26 nömrəli qərarının 3-cü bəndi və 1997-ci il 17 may tarixli 48 nömrəli qərarı qüvvəsini itirmiş hesab edilsin.

6. Bu qərar 1997-ci il avqustun 1-dən etibarən qüvvəyə minir.

Azərbaycan Respublikasının Baş naziri

A.RASİ-ZADƏ.

«Azərbaycan Respublikasının Qanunvericilik Toplusu»nda dərc edilmişdir (31 iyul 1997-ci il, № 1, maddə 78) («AzerSoft»).

31 may 2001-ci il tarixli 105 nömrəli qərara əsasən 5-ci bəndi istisna olmaqla qüvvədən düşmüşdür («AzerSoft»)

Azərbaycan Respublikası Nazirlər Kabinetinin
1997-ci il 21 iyul tarixli 81 nömrəli qərarı ilə təsdiq edilmişdir.
Əlavə № 1

1. Ümumi müddəalar

1.1. Bu Qaydalarla bütün fiziki şəxslər, yəni Azərbaycan Respublikasının vətəndaşları, xarici vətəndaşlar və vətəndaşlığı olmayan şəxslər (sonralar fiziki şəxslər) tərəfindən Azərbaycan Respublikasının gömrük buraxılış məntəqələrindən istehsalat və ya kommersiya fəaliyyəti üçün nəzərdə tutulmayan malların aparılması, gətirilməsi (müşayiət olunmayan mallar da daxil olmaqla) və beynəlxalq poçt vasitəsilə alınması və göndərilməsi əməliyyatları tənzimlənir.

1.2.Fiziki şəxslər bu qaydalarla və Azərbaycan Respublikasının gömrük məsələlərinə aid digər normativ aktlarla müəyyən olunmuş qaydada Azərbaycan Respublikası ərazisindən aparılması və Azərbaycan Respublikası ərazisinə gətirilməsi qadağan olunmuş mallar istisna olmaqla, istənilən malları Azərbaycan Respublikasının gömrük buraxılış məntəqələrindən keçirə bilər.

2. Azərbaycan Respublikası ərazisinə istehsalat və ya kommersiya fəaliyyəti üçün nəzərdə tutulmayan malların gətirilməsi

2.1. Vahid tarif dərəcələri üzrə tutulan gömrük rüsumlarından azad olunmaqla (rüsumsuz) fiziki şəxslər tərəfindən:

Azərbaycan Respublikası ərazisinə ümumi çəkisi 50 kiloqramdan artıq olmayan və ya dəyəri 200 ABŞ dollarına qədər mallar gətirilə bilər;
beynəlxalq poçt göndərişləri vasitəsilə dəyəri 200 ABŞ dollarına qədər və ya çəkisi 20 kiloqramadək olan mallar alına bilər.

2.2. Qaydaların 2.1 yarımbəndində göstərilən hədlərdən artıq ümumi dəyəri 5 min ABŞ dollarına qədər (beynəlxalq poçt göndərişləri üçün 1.000 ABŞ dollarına qədər) mallar gətirildikdə (alındıqda) bu Qaydaları təsdiq etmiş qərərın 3 nömrəli Əlavəsində göstərilən malların hər bir ədədi üzrə rüsumlar ödənilir, siyahıda adları göstərilməyən mallar gətirildikdə isə 50 kiloqramdan (poçt göndərişləri ilə 20 kiloqramdan) artıq olan malın hər bir kiloqramı üçün 0,5 ABŞ dolları ödənilir.

Gətirilən malların ümumi dəyəri 5.000 ABŞ dollarından (poçt göndərişləri ilə alınan malların ümumi dəyəri 1.000 ABŞ dollarından) artıq olduqda isə, həmin malların gömrük rəsmiləşdirilməsi Azərbaycan Respublikası Nazirlər Kabinetinin 1997-ci il 16 iyun tarixli 61 və 62 nömrəli qərarları ilə tənzim edilir.

2.3. Azərbaycan Respublikasında daimi yaşayan və xarici ölkələrdə müvəqqəti fasiləsiz yaşama müddəti 6 ayı keçən fiziki şəxslər tərəfindən Azərbaycan Respublikası ərazisinə ümumi dəyəri 5.000 ABŞ dollarına qədər yalnız ailə üçün zəruri olan mebel, məişət cihazları, əşya və mallar rüsumsuz gətirilə bilər.

Bu həddən artıq əmlak gətirildikdə, həmin malların gömrük, rəsmiləşdirilməsi Azərbaycan Respublikası Nazirlər Kabinetinin 1997-ci il 16 iyun tarixli 61 və 62 nömrəli qərarları ilə tənzimlənir.

2.4. Aşağıdakı mallar Azərbaycan Respublikası ərazisində rüsumsuz və məhdudiyyətsiz gətirilə bilər:

xarici valyuta və xarici valyuta ilə ödəniş sənədləri;
bədii, tarixi, elmi və digər mədəni əşyalar.

3. Azərbaycan Respublikası ərazisindən malların aparılması

3.1. Azərbaycan Respublikası ərazisindən fiziki şəxslər tərəfindən istehsalat və ya kommersiya fəaliyyəti üçün nəzərdə tutulmayan mallar aşağıdakı hədlərlə aparıla bilər:

ümumi dəyəri 1.000 ABŞ dollarına qədər olan mallar;
ümumi dəyəri 200 ABŞ dollarına qədər beynəlxalq poçt göndərişləri;
Azərbaycan Respublikası ərazisinə gəliş zamanı gömrük buraxılış məntəqələrində rəsmiləşdirilmiş şəxsi əşyalar;
Azərbaycan Respublikasında açılmış vərəsəlik hüququ əsasında əldə edilmiş əşyalar və valyuta (aparılması qadağan edilmiş əşyalardan başqa);
Azərbaycan Respublikasından müvəqqəti olaraq xarici ölkələrə gedən fiziki şəxslərin yalnız şəxsi istifadəsi üçün qiymətli metallardan və daşlardan hazırlanmış məmulatlar (Azərbaycan Respublikasının gömrük buraxılış məntəqələrində geri qaytarmaq şərti ilə, gömrük orqanları tərəfindən rəsmiləşdirildikdən sonra).

3.1 yarımbəndin 2-ci və 3-cü abzaslarında göstərilən məbləğlərdən artıq malların aparılması Azərbaycan Respublikası Prezidentinin 1997-ci il 24 iyun tarixli 609 nömrəli Fərmanı ilə təsdiq edilmiş «Azərbaycan Respublikasında idxal-ixrac əməliyyatlarının tənzimlənməsi Qaydaları» və Azərbaycan Respublikası Nazirlər Kabinetinin 1997-ci il 16 iyun tarixli 62 nömrəli qərarı ilə tənzimlənir.

4. Daimi yaşayış məqsədi ilə Azərbaycan Respublikası ərazisinə köçüb gələn Azərbaycan Respublikasından köçüb gedən fiziki şəxslər tərəfindən Azərbaycan Respublikasının gömrük buraxılış məntəqələrindən malların keçirilməsi

4.1. Xarici ölkələrdən Azərbaycan Respublikasına daimi yaşayış məqsədilə köçüb gələn fiziki şəxslər adambaşına ümumi dəyəri 20.000 ABŞ dollarına qədər və yalnız ailə üçün zəruri olan mebel, məişət cihazları, əşya və malları, həmçinin iki il müddətində özgəninkiləşdirməmək şərti ilə ailə üçün bir avtonəqliyyat vasitəsi rüsumsuz gətirə bilər. Bu məbləğdən artıq mal gətirildikdə, malın gömrük rəsmiləşdirilməsi Azərbaycan Respublikası Nazirlər Kabinetinin 1997-ci il 16 iyun tarixli 61 və 62 nömrəli qərarları ilə tənzimlənir.

4.2. Azərbaycan Respublikasından daimi yaşayış məqəsədilə xarici ölkələrə köçüb gedən fiziki şəxslər adambaşına ümumi dəyəri 10.000 ABŞ dolları məbləğində şəxsi istifadə üçün zəruri olan mebel, məişət cihazları, əşya və malları, habelə adambaşına (16 yaşdan yuxarı) ümumi dəyəri 1.000 ABŞ dolları həcmində qiymətli metal və daşlardan hazırlanmış məmulatlar apara bilər.

Bu məbləğlərdən artıq malların aparılması Azərbaycan Respublikası Prezidentinin 1997-ci il 24 iyun tarixli 609 nömrəli Fərmanı ilə təsdiq edilmiş «Azərbaycan Respublikasında idxal-ixrac əməliyyatlarının tənzimlənməsi Qaydaları» və Azərbaycan Respublikası Nazirlər Kabinetinin 1997-ci il 16 iyun tarixli 62 nömrəli qərarı ilə tənzimlənir.

5. Fiziki şəxslər tərəfindən Azərbaycan Respublikasının gömrük buraxılış məntəqələrindən nəqliyyat vasitələrinin keçirilməsi

Fiziki şəxslər tərəfindən Azərbaycan Respublikasının gömrük buraxılış məntəqələrindən istehsalat və ya kommersiya fəaliyyəti üçün nəzərdə tutulmayan nəqliyyat vasitələri (xarici iqtisadi fəaliyyətdəki əmtəə nomenklaturasının 8703-cü qrupu) keçirilərkən:

5.1. Gömrük sərhədini keçənədək istehsal-buraxılış tarixindən 1 (bir) ilə qədər keçmiş nəqliyyat vasitələri üçün (bir ilədək özgəninkiləşdirməmək şərtilə) yürüş kilometrindən asılı olmayaraq, mühərrikin həcminin hər kub santimetrinə görə 0,4 ABŞ dolları məbləğində rüsum ödənilir.

5.2. Gömrük sərhədini keçənədək istehsal-buraxılış tarixindən 1 (bir) ildən çox ötmüş nəqliyyat vasitələri üçün yürüş kilometrindən asılı olmayaraq, mühərrikin həcminin hər kub santimetrinə görə 0,7 ABŞ dolları məbləğində rüsum ödənilir.

5.3. Gətirilən nəqliyyat vasitələri gömrük buraxılış sərhədini keçdiyi vaxtdan 30 gündən gec olmayaraq bəyan edilməlidir. Bəyan edilmə tarixindən asılı olmayaraq, gömrük buraxılış sərhədindən keçmə tarixi bəyan edilmə tarixi hesab edilir.

5.4. Fiziki şəxslər tərəfindən Azərbaycan Respublikası ərazisinə müvəqqəti, yəni bir ilədək gətirilən nəqliyyat vasitəsinin bu müddət ərzində digər fiziki və ya hüquqi şəxsə özgəninkiləşdirilməməklə sahibliyə verilməmək barədə Azərbaycan Respublikasının gömrük orqanlarına öhdəlik verildiyi təqdirdə gömrük rüsumu ödənilmədən bəyan edilir.

5.5. Fiziki şəxslər tərəfindən bu Qaydaların 5.1 və 5.4 yarımbəndlərinin müddəaları pozulduqda, Azərbaycan Respublikası ərazisinə gətirilmiş nəqliyyat vasitəsi üçün bütün gömrük ödənişlərin ümumi cəminə bərabər miqdarda gömrük ödənci tutulur.

5.6. Fiziki şəxslər tərəfindən Azərbaycan Respublikasındakı fiziki və hüquqi şəxslərin ünvanına nəqliyyat vasitələrinin göndərilməsi bütün gömrük ödənişlərin ümumi cəminə bərabər miqdarda gömrük ödənci ödənilmək şərtilə həyata keçirilə bilər.

5.7. Əlillər üçün xüsusi olaraq hazırlanmış nəqliyyat və ya digər hərəkət vasitələri Azərbaycan Respublikası ərazisinə Əmək və Əhalinin Sosial Müdafiəsi Nazirliyinin təsdiqedici sənədi olduğu təqdirdə rüsumsuz gətirilə bilər.

6. Azərbaycan Respublikasının gömrük buraxılış məntəqələrindən bəzi kateqoriyalı malların keçirilməsi (aparılması, gətirilməsi və beynəlxalq poçt vasitəsilə göndərilməsi, alınması)

6.1. Ov silahları, onların sursatları Azərbaycan Respublikası Daxili İşlər Nazirliyinin icazəsi təqdim edildikdən sonra Azərbaycan Respublikasının gömrük buraxılış məntəqələrindən keçirilə bilər.

6.2. Heyvanlar, baytarlıq təbabətində tətbiq olunan dərman, bioloji preparatlar və baytarlıq ləvazimatları, bitkilər, heyvan və bitki mənşəli xammal baytarlıq orqanları və bitkilərin karantini üzrə müvafiq dövlət orqanlarının icazəsi olduğu təqdirdə Azərbaycan Respublikasının gömrük buraxılış məntəqələrindən keçirilə bilər.

6.3. Azərbaycan Respublikası ərazisinə gələn və xaricə gedən fiziki şəxslər şəxsi istifadə üçün zəruri olan miqdarda dərman vasitələrini maneəsiz gətirə və apara bilər.

Fiziki şəxslər tərəfindən bu miqdardan artıq dərman vasitələrinin idxalı və ixracı Azərbaycan Respublikası Prezidentinin 1997-ci il 17 yanvar tarixli 540 nömrəli Fərmanı ilə müəyyən olunmuş qaydada həyata keçirilir.

6.4. Nərə, ağ balıq və qızıl balıq kürüsünün hər birindən 600 qrama qədər fiziki şəxs tərəfindən aparıla bilər.

6.5. Bədii, tarixi, elmi əhəmiyyət kəsb edən və başqa qiymətli mədəni əşyalar (o cümlədən 1965-ci ilə qədər buraxılmış, yerli və xarici seriyalı və kütləvi istehsal məhsulu olmayan əşyalar, əllə toxunmuş xalçalar, xalça və xalça məmulatları, billur çini və keramika qabları musiqi alətləri, təsviri sənət əsərləri, 1950-ci ilə qədər olan çap məhsulları və s.) Azərbaycan Respublikası Mədəniyyət Nazirliyinin icazəsi olduqda və müəyyən edilmiş komissyon dəyərinin 100%-i məbləğində gömrük rüsumu ödənildikdən sonra Azərbaycan Respublikasından aparıla bilər. Bu malların siyahısı Azərbaycan Respublikasının Mədəniyyət Nazirliyi tərəfindən hazırlanıb Azərbaycan Respublikasının Gömrük Komitəsinə təqdim edilir.

6.6. Fiziki şəxslər tərəfindən Azərbaycan Respublikası ərazisinə gətirilən hər özügedən motorlu nəqliyyat vasitəsi üçün zavod buraxılış tutumundan əlavə 20 litr yanacaq gətirilə bilər.

6.7. Azərbaycan Respublikası ərazisinə gələn hər bir fiziki şəxs 5 litrə qədər spirt və spirtli içkilər 1000 ədəd (50 qutu) siqaret gətirə bilər. Bu hədlərdən artıq həmin malların gətirilməsi Azərbaycan Respublikası Nazirlər Kabinetinin 1997-ci il 22 mart tarixli 24 nömrəli, 1997-ci il 16 iyun tarixli 61 və 62 nömrəli qərarları ilə tənzimlənir.

6.8. Xarici və milli valyutanın (manatın) Azərbaycan Respublikasının gömrük buraxılış məntəqələrindən keçirilməsi qaydaları qüvvədə olan qanunvericiliklə tənzimlənir.

7. Azərbaycan Respublikasına fiziki şəxslər tərəfindən gətirilməsi və beynəlxalq poçt göndərişləri vasitəsilə alınması qadağan olunmuş mallar

7.1. Yivli odlu silah növləri, döyüş sursatı (ov silahları üçün sursatlar istisna edilməklə), hərbi təyinatlı bütün əşyalar, partlayıcı maddələr, hərbi texnika.

7.2. Radioaktiv maddələr.

7.3. Narkotik və psixotrop maddələr, onlardan istifadə üçün ləvazimat.

7.4. Əxlaq pozğunluğunu, zorakılığını, terrorizmi təbliğ və reklam edən materiallar.

7.5.Narkotik, psixotrop, zəhərləyici, partlayıcı maddələrin hazırlanması texnologiyasına aid materiallar.

8. Azərbaycan Respublikasından fiziki şəxslər tərəfindən aparılması və beynəlxalq poçt vasitəsilə göndərilməsi qadağan olunmuş mallar

8.1. Canlı heyvanlar (it, pişik istisna olmaqla).

8.2. Qiymətli ağac cinsləri (qoz, şabalıd, cökə, palıd, fıstıq, dəmir ağacı).

8.3. Hər cür silah növləri, döyüş sursatı, hərbi təyinatlı hər cür əşyalar, partlayıcı maddələr, hərbi texnika.

8.4. Radioaktiv maddələr.

8.5. Narkotik və psixotrop maddələr, onlardan istifadə üçün ləvazimat.

8.6. Əxlaq pozğunluğunu, zorakılığı, terrorizmi təbliğ və reklam edən materiallar.

8.7. Narkotik, psixotrop, zəhərləyici, partlayıcı maddələrin hazırlanması texnologiyasına aid materiallar.

8.8. Xüsusi məxfi rabitə vasitələri, onların şifrləri və istismarı haqqında ədəbiyyat.

8.9. Müdafiə, Milli Təhlükəsizlik və Daxili İşlər nazirliklərinin operativ istintaq fəaliyyəti üzrə informasiya sistemləri, sənədləri və arxivləri.

8.10. Dövlət əhəmiyyətli sənədlər, ixtiralar, layihələr.

8.11. Xammal şəklində olan qiymətli metallar və qiymətli qaşlar.

8.12. Azərbaycan Respublikasının Qırmızı Kitabına düşmüş nadir bitkilər, maral və cüyür buynuzları.

Azərbaycan Respublikası
Nazirlər Kabinetinin 1997-ci il 21 iyul tarixli
81 nömrəli qərarı ilə təsdiq edilmişdir.
Əlavə № 2

Azərbaycan Respublikası gömrük buraxılış məntəqələrindən gömrük rüsumları ödənilmədən fiziki şəxslər tərəfindən müvəqqəti keçirilən (gətirilən, çıxarılan) malların Siyahısı

1. Geyim və şəxsi istifadə üçün lazım olan digər ləvazimatlar

2. Şəxsi istifadə üçün zərgərlik bəzək məmulatları

3. Foto- və kinokameralar, zəruri miqdarda plyonka və ləvazimatla birlikdə

4. Portativ slaydo və kinoproyektorlar, zəruri miqdarda slayd və filmlər ilə birlikdə

5. Videokamera və portativ videomaqnitafonlar, zəruri miqdarda plyonka ilə birlikdə

6. Qramplastinkaları səsləndirən radiocihazlar

7. Portativ səsyazan və səsverən radiocihazlar (diktofonlar da daxil olmaqla), plyonka ilə birlikdə

8. Portativ radioqəbuledici

9. Portativ televizor

10. Portativ yazı makinası

11. Portativ kalkulyatorlar

12. Portativ kompyüterlər

13. Durbin

14. İdman ləvazimatları, çadır və digər turist ləvazimatları, balıq tutmaq üçün ləvazimatlar, alpinist ləvazimatları, sualtı üzmək üçün ləvazimatlar, idman silahı ləvazimatları ilə birlikdə, velosipedlər, tennis raketkaları

15. Portativ dializatorlar və ona bənzər tibbi cihazlar, həmçinin onlar üçün işlədilən materiallar.

Azərbaycan Respublikası
Nazirlər Kabinetinin 1997-ci il 21 iyul tarixli
81 nömrəli qərarı ilə təsdiq edilmişdir.
Əlavə № 3

Azərbaycan Respublikası ərazisinə fiziki şəxslər tərəfindən (beynəlxalq poçt göndərişləri də daxil olmaqla) gətirilən malların bir ölçü vahidinə tətbiq edilən gömrük rüsumlarının dərəcələri

Sıra №-si	Malın adı	Ölçü vahidi	Malın ölçü vahidinə tətbiq edilən gömrük rüsumunun dərəcəsi ABŞ dolları ilə
1.	Rəngli televizorlar:
	Diaqonalı 31 sm	ədəd	20,0
	Diaqonalı 37 sm — 51 sm	ədəd	30,0
	Diaqonalı 54 sm — 61 sm	ədəd	40,0
	Diaqonalı 64 sm — 72 sm	ədəd	60,0
	Diaqonalı 82 sm — 86 sm	ədəd	100,0
	Diaqonalı 86 sm-dən yuxarı	ədəd	200,0
2.	Videoplyeyer və maqnitofonla birləşdirilmiş rəngli televizorlar:
	Diaqonalı 31 sm-ə qədər	ədəd	50,0
	Diaqonalı 37 sm — 51 sm	ədəd	100,0
	Diaqonalı 51 sm — 72 sm	ədəd	150,0
	Diaqonalı 72 sm-dən yuxarı	ədəd	250,0
3.	Videosəsyazan və ya videogöstərən aparat kamera ilə	ədəd	150,0
4.	Videomaqnitofon (pleyer)	ədəd	10,0
5.	Videomaqnitofon	ədəd	15,0
6.	Videooyunlar (kasetli)	ədəd	10,0
7.	Videooyunlar üçün katriclər	ədəd	1,0
8.	Videooyunlar (diskli)	ədəd	20,0
9.	Disklər	ədəd	3,0
10.	Fotoaparatlar	ədəd	3,0
11.	Maqnitofon 1 kassetli	ədəd	10,0
12.	Maqnitofon 2 kassetli	ədəd	20,0
13.	Portativ maqnitofon (diktafon)	ədəd	5,0
14.	Portativ radioqəbuledici	ədəd	5,0
15.	Avtomobil maqnitofonu	ədəd	15,0
16.	Avtomobil maqnitofonu (diskli)	ədəd	40,0
17.	Portativ televizor	ədəd	20,0
18.	Musiqi mərkəzləri	ədəd	40,0
19.	Maqnitolalar	ədəd	10,0
20.	Gücləndiricilər	ədəd	20,0
21.	Videokameralar	ədəd	100,0
22.	Videokassetlər	ədəd	1,0
23.	Audiokassetlər	ədəd	0,1
24.	Qol saatı (mexaniki)	ədəd	5,0
25.	Qol saatı (kvars və elektron)	ədəd	2,0
26.	Divar və stolüstü saat	ədəd	1,0
27.	Paltaryuyan maşın	ədəd	20,0
28.	Tozsoran (avtomobil üçün)	ədəd	5,0
29.	Tozsoran (ev üçün)	ədəd	15,0
30.	Mətbəx kombaynları, elektrik ətçəkən maşınlar, mikserlər və şirəçəkənlər (hər biri üçün)	ədəd	25,0
31.	Məişət soyuducuları və buzlandırıcıları:
	həcmi 280 litrə qədər	ədəd	50,0
	həcmi 280 litrdən yuxarı	ədəd	150,0
32.	Kondisionerlər:
	məişət üçün	ədəd	50,0
	avtomobillər üçün	ədəd	20,0
33.	Su qarışdırıcıları (smesitel)	ədəd	2,0
34.	Elektrik ütüsü	ədəd	5,0
35.	Minik avtomobilləri üçün:
	təzə şinlər	ədəd	5,0
	istifadə olunmuş şinlər	ədəd	10,0
36.	Brilyant	karat	100,0
37.	Qiymətli metallar və onlardan hazırlanmış məmulatlar və onların hissələri	qram	1,0
38.	Evdə işlədilən generatorlar:
	3 kw-a qədər	ədəd	20,0
	3 kw—6 kw	ədəd	40,0
	6 kw—10 kw	ədəd	120,0
	10 kw-dan yuxarı	ədəd	120,0
39.	Mikrodalğalı soba	ədəd	30,0
40.	Şərinkeşlər	ədəd	10,0
41.	Elektrik üzqırxanları	ədəd	10,0
42.	Elektrik su nasosları	ədəd	10,0
43.	Seyflər	ədəd	50,0
44.	Elektrik su qızdırıcıları:
	həcmi 50 litrə qədər	ədəd	15,0
	həcmi 50 litrdən yuxarı	ədəd	25,0
45.	Telefon aparatı	ədəd	5,0
46.	Hava təmizləyicisi	ədəd	10,0
47.	Yağla işləyən qızdırıcılar	ədəd	20,0
48.	Paltartikən maşınlar	ədəd	5,0
49.	Peyk antenləri:
	süzgəcli	ədəd	20,0
	süzgəcsiz	ədəd	10,0
50.	Duxovka	ədəd	15,0
51.	Elektrik manqalı	ədəd	15,0
52.	Xalça	kv.metr	10,0
53.	Kovrolit	kv.metr	3,0
54.	Qaz plitəsi	ədəd	10,0
55.	Elektrik mətbəx qızdırıcıları	ədəd	10,0
56.	Xəzdən geyim	ədəd	60,0