Maddə 1

Tərəflər yük və sərnişin göndərişlərində və poçt mübadiləsində gömrük nəzarətinin sürətləndirilməsinə, həmçinin Tərəflərin dövlətlərinin iqtisadi və digər maraqlarına mümkün ziyan vurulmasına yol verməmək məqsədilə, nəqliyyat vasitələrinin, yüklərin, baqajın, poçt göndərişlərinin, valyutanın, digər ödəniş vasitələrinin və valyuta sərvətlərinin qanunsuz gətirilməsi, aparılması və tranzitinin qarşısının alınmasına yönələn bütün zəruri tədbirləri görəcəklər.

Maddə 2

Tərəflər bu Saziş əsasında, öz səlahiyyətləri çərçivəsində bir-biri ilə əməkdaşlıq edəcək və öz dövlətlərinin qanunvericiliyinə əməl etməklə, aşağıdakılarla mübadilə edəcəklər:

a) qüvvədə olan gömrük qanunvericiliyi haqqında məlumat;

b) qaçaqmalçılıq və gömrük qaydalarının pozulması ilə mübarizə metodları, eləcə də qaçaqmalçılıq və silahların, döyüş sursatlarının, partlayıcı maddələrin, narkotik vasitələrin, psixotrop maddələrin və prekursorların qanunsuz dövriyyəsinin qarşısının alınması, təhqiqatının aparılması və aradan qaldırılması üzrə hərəkətlərin fəallaşdırılması haqqında məlumat;

c) texniki nəzarət vasitələrindən istifadə və kinoloji xidmətlərin təcrübəsi;

ç) qaçaqmalçılıq, silahların, döyüş sursatlarının, partlayıcı maddələrin, narkotik vasitələrin, psixotrop maddələrin və prekursorların qanunsuz dövriyyəsi ilə mübarizə metodlarının tədrisi məqsədilə mütəxəssislər;

d) qaçaqmalçılıq, silahların, döyüş sursatlarının, partlayıcı maddələrin, narkotik vasitələrin, psixotrop maddələrin və prekursorların qanunsuz dövriyyəsi ilə mübarizə məsələləri üzrə elmi nəşrlər və tədris vasitələri;

e) narkotik vasitələrin, psixotrop maddələrin və prekursorların yeni növləri və istehsal yerləri haqqında məlumat;

ə) narkotik vasitələrin, psixotrop maddələrin və prekursorların eyniləşdirilməsi və laboratoriya analizi sahəsində məlumat;

f) müxtəlif ölkə və regionlarda silahların və narkotik vasitələrin, psixotrop maddələrin və prekursorların qiymətlərinin dəyişməsi barədə məlumat;

g) narkotik vasitələrin, psixotrop maddələrin və prekursorların sintezi üçün istifadə olunan başlanğıc kimyəvi preparatlar haqqında məlumat;

ğ) silahların, döyüş sursatlarının, partlayıcı maddələrin, narkotik vasitələrin, psixotrop maddələrin və prekursorların qanunsuz keçirilməsi marşrutları və gizlədilmə üsulları haqqında məlumat.

Maddə 3

Tərəflərdən hər biri öz təşəbbüsü ilə və ya digər Tərəfin sorğusu əsasında aşağıdakılar barədə operativ məlumatları təqdim edəcəkdir:

a) silahların, döyüş sursatlarının, partlayıcı maddələrin, narkotik vasitələrin, psixotrop maddələrin və prekursorların qaçaqmalçılığı və/və ya qanunsuz dövriyyəsi ilə məşğul olan və ya bu işdə şübhəli bilinən şəxslər haqqında;

b) qaçaqmalçılığın keçirilməsi üçün istifadə olunan nəqliyyat vasitələri, yüklər və poçt göndərişləri haqqında;

c) bir Tərəfin dövlətinin ərazisindən digər Tərəfin dövlətinin ərazisinə qaçaqmalçılıq əşyalarının və silahların, döyüş sursatlarının, partlayıcı maddələrin, narkotik vasitələrin, psixotrop maddələrin və prekursorların qanunsuz keçirilməsinin aşkar edilməsi faktları haqqında.

Maddə 4

Tərəflərin həm şifahi, həm də yazılı şəkildə təqdim etdiyi məlumatlar məxfi hesab ediləcək və yalnız bu Sazişin yerinə yetirilməsi məqsədləri üçün istifadə ediləcəkdir.

Tərəflər bu Sazişin müddəalarına uyğun olaraq alınmış məlumatı, bu məlumatı təqdim etmiş Tərəfin yazılı razılığı olmadan üçüncü tərəfə verməməyi öhdələrinə götürürlər.

Maddə 5

Əməkdaşlıq məsələləri üzrə sorğularda aşağıdakılar göstərilir: sorğu göndərən orqanın adı, barəsində sorğunun göndərildiyi məsələnin mahiyyətinin qısa şərhi, sorğunun predmeti və onun icrası üçün zəruri məlumatlar. Tərəflər sorğuları bir-birinə yazılı şəkildə göndərirlər. Sorğular, sorğu göndərən Tərəfin orqanlarının rəhbərləri tərəfindən imzalanır.

Təcili sorğular şifahi şəkildə verilə bilər. Lakin belə sorğular gecikdirilmədən yazılı şəkildə təsdiq olunmalıdır. Sorğular alındığı gündən etibarən bir ay müddətindən gec olmayaraq icra olunur. Sorğuların başqa idarə və müəssisələrə göndərildiyi hallar barədə, həmçinin onların yerinə yetirilməsinə maneə yaradan şərtlər barədə sorğu göndərən Tərəf dərhal xəbərdar edilir.

Sorğunun icrası sorğu alan Tərəfin milli qanunvericiliyinə müvafiq olaraq həyata keçirilir.

Maddə 6

Əgər Tərəflərdən birinin digər Tərəfə göndərdiyi sorğu digər Tərəfin dövlətinin suverenliyinə və milli təhlükəsizliyinə ziyan vura bilərsə, əsas və dəlillər göstərilməklə sorğunun icrasından imtina edilə bilər.

Maddə 7

Tərəflərin dövlətlərinin qanunvericiliyinə əsasən və qarşılıqlı razılaşmaya görə gömrük xidmətləri, zəruri hallarda, narkotik vasitələrin, psixotrop maddələrin və prekursorların qanunsuz dövriyyəsinə aidiyyəti olan şəxslərin aşkar edilməsi məqsədilə nəzarətli göndəriş metodundan istifadə edirlər.

Nəzarətli göndəriş metodundan istifadəyə dair qərarlar hər bir konkret halda ayrıca olaraq qəbul edilir və lazım gəldikdə Tərəflərin maliyyə razılaşmaları nəzərə alına bilər.

Maddə 8

Əgər Tərəflərdən biri digər Tərəfin vəzifəli şəxsinin qaçaqmalçılıq və ya gömrük qaydalarının pozulması faktı üzrə şahid və ya ekspert qismində iştirakında maraqlıdırsa, onda o, digər Tərəfə müvafiq sorğu ilə müraciət etmək hüququna malikdir.

Bu cür sorğunun təmin edilməsi bu Sazişin 4 və 6-cı maddələri ilə tənzimlənir.

Tərəflərdən birinin vəzifəli şəxsləri digər Tərəfin dövlətinin ərazisində olduqları dövrdə öz rəsmi səlahiyyətlərinin sənədli təsdiqinə malik olmalıdırlar.

Maddə 9

Bu Sazişin yerinə yetirilməsi, təfsiri və dəyişdirilməsi ilə bağlı bütün mübahisəli məsələlər Tərəflər arasında məsləhətləşmələr və danışıqlar yolu ilə həll ediləcəkdir.

Maddə 10

Bu Sazişə iki Tərəfin qarşılıqlı razılığı ilə bu Sazişin ayrılmaz hissəsi olan və bu Sazişin 15-ci maddəsinə müvafiq olaraq, qüvvəyə minən protokollar şəklində rəsmiləşdiriləcək dəyişikliklər və əlavələr edilə bilər.

Maddə 11

Tərəflər arasında yazışmalar rus dilində aparılacaqdır.

Maddə 12

Tərəflər, onların nümayəndələri olmayan, şahidlik üçün çağırılan mütəxəssislərin və tərcüməçilərin qonorarlarının ödənişləri istisna olmaqla, bu Sazişin yerinə yetirilməsi ilə bağlı xərclərin əvəzinin ödənilməsinə dair hər hansı iddialardan imtina edirlər.

Maddə 13

Bu Sazişin müddəaları Tərəflərin dövlətlərinin iştirakçıları olduqları digər beynəlxalq müqavilələr üzrə hüquq və öhdəliklərinə toxunmur.

Maddə 14

Bu Sazişin qüvvəyə minməsi ilə Azərbaycan Respublikası Dövlət Gömrük Komitəsi və Ukrayna Dövlət Gömrük Xidməti arasında qaçaqmalçılıqla və gömrük qaydalarının pozulması ilə mübarizədə əməkdaşlıq haqqında 20 may 1993-cü il tarixli Saziş və Azərbaycan Respublikası Dövlət Gömrük Komitəsi və Ukrayna Dövlət Gömrük Xidməti arasında narkotiklərin və psixotrop maddələrin qanunsuz dövriyyəsi ilə mübarizədə əməkdaşlıq haqqında 20 may 1993-cü il tarixli Saziş qüvvədən düşür.

Maddə 15

Bu Saziş onun qüvvəyə minməsi üçün zəruri olan dövlətdaxili prosedurları Tərəflərin yerinə yetirdikləri barədə diplomatik kanallar vasitəsilə son yazılı bildirişin alındığı tarixdən qüvvəyə minir və qeyri-müəyyən müddətə bağlanılır. Tərəflərdən hər biri digər Tərəfi diplomatik kanallarla bu haqda yazılı şəkildə xəbərdar etməklə, Sazişi ləğv edə bilər. Bu cür xəbərdarlığın alındığı tarixdən altı ay sonra Saziş qüvvəsini itirir.

Kiyev şəhərində 2004-cü il 3 iyun tarixində hər biri Azərbaycan, Ukrayna və rus dillərində iki əsl nüsxədə imzalanmışdır, bütün mətnlər autentikdir.

Bu Sazişin müddəalarının təfsirində fikir ayrılığı yarandıqda, rus dilində olan mətn üstün qüvvəyə malik olacaqdır.