Gömrük məcəlləsində nəzərdə tetulmuş rejimlərə uyğun olaraq ödənilməli olan gömrük ödənişləri məbləğlərinin gömrük orqanının depozitinə verilməsi ilə təmin edilməsi və onların qaytarılması
Qaydaları

1. Ümumi müddəalar

1.1. Bu Qaydalar Gömrük Məcəlləsində nəzərdə tutulmuş rejimlərə uyğun olan gömrük tədiyyələrinin ödəniləcəyinə gömrük orqanının depozitinə pul vəsaitlərinin köçürülməsi yolu ilə təminat verilməsini müəyyənləşdirir.

1.2. Bu Qaydalarda aşağıdakı anlayışlardan istifadə olunur:

2. Pul vəsaitlərinin gömrük orqanının depozitinə köçürülməsi

2.1. Təyinatı üzrə çatdırılan mallara görə gömrük rejiminə uyğun tədiyyələrin ödəniləcəyinə təminat kimi köçürülən pul vəsaitləri ödəyici tərəfindən daxili gömrük orqanının depozitinə köçürülür.

2.2. Gömrük rejiminə uyğun tədiyyələrin ödəniləcəyinə təminat kimi gömrük orqanının depozitinə köçürülən pul vəsaitləri dönərli xarici valyutada, yaxud ödənişin yerinə yetirildiyi gün Azərbaycan Respublikasının Milli Bankı tərəfindən müəyyənləşdirilən məzənnə üzrə manatla ödənilir.

2.3. Gömrük rejiminə uyğun tədiyyələrin ödəniləcəyinə təminat kimi tələb olunan pul vəsaitlərinin məbləği əmtəə partiyasının sərbəst dövriyyəyə buraxılması üçün hesablanan gömrük vergi və rüsumlarının ümumi məbləğindən az olmamalıdır.

2.4. Təyinatı üzrə çatdırılan mallara görə gömrük rejiminə uyğun tədiyyələrin ödəniləcəyinə təminat kimi istifadə olunan pul vəsaitləri gömrük orqanının depozitinə əvvəlcədən, yaxud onlar Azərbaycan Respublikasının gömrük sərhədini keçərkən köçürülür.

2.5. Ödəyici tərəfindən hər bir əmtəə partiyası üçün ayrıca ödəniş tapşırığı tərtib olunur. Bir əmtəə partiyasına təminat kimi ödənilən pul vəsaitlərinin gömrük orqanının depozitinə müxtəlif valyutada köçürülməsinə yol verilmir.

2.6. Pul vəsaitlərinin gömrük orqanının depozitinə köçürülməsi haqqında ödəniş tapşırığı sənədinin «Ödənişin təyinatı» qrafasında «_____________» gömrükxanasının «_________» buraxılış məntəqəsindən «__» «_______» ___ il tarixli «__» №-li müqavilə əsasında «___» miqdarda təyinatı üzrə çatdırılan (tranzit) mallara görə gömrük tədiyyələrinin ödəniləcəyinə təminat («_____» ____ il tarixli «___»№-li hesab-faktura üzrə) qeydi aparılır.

Pul vəsaitləri gömrük orqanının depozitinə malların alıcısı tərəfindən deyil, başqa şəxs (şəxslər) tərəfindən köçürülərsə, bu qrafada onların hansı şəxsin əvəzinə köçürüldüyü göstərilməlidir.

2.7. Təyinatı üzrə çatdırılan mallara görə ödəniş tapşırığı sənədinin surəti gömrük rəsmiləşdirilməsi üçün tələb olunan digər sənədlərlə birlikdə daxili gömrük orqanına təqdim olunur.

3. Təyinatı üzrə çatdırılan malların gömrük rəsmiləşdirilməsi

Azərbaycan Respublikasının ərazisinə idxal olunan malların gömrük rəsmiləşdirilməsi gömrük rejiminə uyğun tədiyyələrin ödəniləcəyinə təminat kimi depozitinə pul vəsaitləri köçürülmüş daxili gömrük orqanı tərəfindən yerinə yetirilir. Bu zaman gömrük bəyannaməsinin 47-ci qrafasının 5-ci sütununda ödəniş üsulu — «GD» (gömrük depoziti), «V» qrafasında (hesablamanın təfsilatı) depozitə köçürülmüş pul vəsaitinin məbləği, ödəniş tapşırığının tarixi və nömrəsi qeyd olunur.

Pul vəsaitləri daxili gömrük orqanının depozitinə köçürüldükdən sonra bu haqda həmin gömrük orqanı tərəfindən göndərən gömrük orqanına məlumat verilir və təyinatı üzrə çatdırılan mallar gömrük nəzarəti rejiminə uyğun qaydada daxili gömrük orqanına göndərilir.

Daxili gömrük orqanının depozitinə köçürülmüş pul vəsaitlərinin məbləği gömrük rejiminə uyğun olaraq təyinatı üzrə çatdırılan mallara hesablanacaq gömrük tədiyyələrinin məbləğindən az olduğu halda, pul vəsaitlərinin çatışmayan məbləği ödənilənədək, malların daxili gömrük orqanına göndərilməsinə yol verilmir.

Alıcının yaxud digər maraqlı şəxsin xahişi və Dövlət Gömrük Komitəsinin yazılı razılığı ilə təyinatı üzrə çatdırılan malların gömrük rəsmiləşdirilməsi göndərən gömrük orqanı tərəfindən yerinə yetirilə bilər. Bu zaman göndərən gömrük orqanı tərəfindən daxili gömrük orqanına müvafiq məlumat verilməlidir.

4. Gömrük orqanının depozitinə verilmiş pul vəsaitlərindən istifadə olunması və qaytarılması

4.1. Malların gömrük rəsmiləşdirilməsi başa çatanadək, ödəyici gömrük orqanının depozitinə köçürdüyü pul vəsaitlərindən digər məqsədlərə istifadə edə bilməz (malların Azərbaycan Respublikası ərazisinə gətirilməsindən imtina olunması halları istisna edilməklə).

4.2. Müvafiq gömrük orqanının depozitinə köçürülmüş pul vəsaitləri malların gömrük rəsmiləşdirilməsi zamanı gömrük rejiminə uyğun tədiyyələrin ödənilməsinə yönəldilir.

Bu zaman ödəyici müvafiq gömrük orqanının depozitinə köçürdüyü pul vəsaitlərinin gömrük rejiminə uyğun tədiyyələrinin ödənilməsinə yönəldilməsi barədə ərizəni (bu Qaydaların 1 №-li əlavəsi) həmin gömrük orqanına təqdim etməlidir.

Ödəyici tərəfindən belə ərizə təqdim olunmadığı hallarda, seçilmiş gömrük rejiminə uyğun olaraq YGB üzrə hesablanmış bütün tədiyyələr müvafiq gömrük orqanının hesabına daxil olduqdan sonra mallar sərbəst tədavülə buraxıla bilər.

Bu halda YGB üzrə hesablanmış bütün gömrük tədiyyələri ödənildikdən sonra gömrük orqanının depozitinə artıq köçürülmüş pul vəsaitləri ödəyiciyə qaytarılır.

4.3. Müvafiq gömrük orqanının depozitinə köçürülmüş pul vəsaitlərinin məbləği gömrük rejiminə uyğun olaraq hesablanmış tədiyyələrin məbləğindən az olarsa, çatışmayan məbləğ YGB qəbul olunanadək yaxud onun qəbul olunması ilə eyni vaxtda həmin gömrük orqanının hesabına ödənilməlidir.

Gömrük tədiyyələrinin çatışmayan məbləği ödənilmədikdə, mallar sərbəst tədavülə buraxılmır.

4.4. Müvafiq gömrük orqanının depozitinə köçürülmüş pul vəsaitlərinin məbləği gömrük rejiminə uyğun olaraq hesablanmış tədiyyələrin məbləğindən çox olarsa, artıq köçürülmüş pul vəsaitləri ödəyicinin ərizəsi (bu Qaydaların 2 №-li əlavəsi) əsasında, müəyyən edilmiş qaydada həmin gömrük orqanı tərəfindən geri qaytarılır, yaxud gələcək təminatlar və ya növbəti gömrük tədiyyələrinin ödənilməsi üçün istifadə olunur.

4.5. Təyinatı üzrə çatdırılan malların daxili gömrük orqanına təqdim olunması üçün müəyyən edilmiş müddət başa çatdıqdan 30 təqvim günü sonra, gömrük orqanının depozitinə köçürülmüş pul vəsaitləri respublika büdcəsinə köçürülür.

Dövlət büdcəsinin nəfinə köçürülmüş pul vəsaitləri geri qaytarılmır. Pul vəsaitlərini gömrük orqanının depozitinə köçürən ödəyici malların daşıyıcısı deyilsə, həmin şəxs qüvvədə olan qanunvericiliyə uyğun olaraq, özünə dəymiş ziyanın və itkilərin əvəzinin ödənilməsi barədə malların daşıyıcısına qarşı iddia qaldırmaq hüququna malikdir.

4.6. Alıcı barəsində tətbiq edilən gömrük tədiyyələrinin ödəniləcəyinə təminat verilmiş malların Azərbaycan Respublikasının gömrük ərazisinə gətirməkdən imtina edərsə və yaxud Gömrük Məcəlləsinə uyğun olaraq bu ərazidən çıxarılmasını, habelə müvafiq qaydada geri qaytarılmasını təmin edərsə, Dövlət Gömrük Komitəsinin icazəsi ilə gömrük orqanı ödəyicinin ərizəsi (bu Qaydaların 3 №-li əlavəsi) və göndərən gömrük orqanının bu malları daxili gömrük orqanının ünvanına göndərməməsini, habelə müvafiq rəsmiləşdirilməni təsdiq edən sənəd əsasında bu pul vəsaitlərini geri qaytarır, yaxud gələcək gömrük tədiyyələrinin təminatına yönəldir.

4.7. Depozitdə saxlanıldığı müddətdə pul vəsaitlərinə faiz hesablanmır və həmin məbləğ indeksasiya olunmur.

4.8. Gömrük orqanının depozitinə köçürülmüş pul vəsaitlərinin dövlət büdcəsinin nəfinə alınması faktı gömrük qaydalarını pozmuş şəxsləri Gömrük Məcəlləsinə uyğun olaraq, məsuliyyətə cəlb olunmaqdan azad etmir.