Bakı şəhəri, 10 fevral 2001-ci il

Bazarlarda, yarmarkalarda və xüsusi olaraq satış üçün ayrılmış digər yerlərdə müxtəlif malların və məhsulların satışını həyata keçirən fiziki şəxslərdən alınan birdəfəlik dövlət rüsumunun dərəcələrinə dəyişiklik edilməsi barədə Azərbaycan Respublikası Maliyyə Nazirliyinin təklifini nəzərə alaraq, Azərbaycan Respublikasının Nazirlər Kabineti qərara alır:

1. «Bazarlarda, yarmarkalarda və xüsusi olaraq satış üçün ayrılmış digər yerlərdə malların, məmulatların və kənd təsərrüfatı məhsullarının satışını həyata keçirən fiziki şəxslərdən birdəfəlik rüsumun dərəcələri haqqında» Azərbaycan Respublikası Nazirlər Kabinetinin 1995-ci il 16 iyun tarixli 148 nömrəli qərarının 2-ci bəndi aşağıdakı yeni redaksiyada verilsin:

«2. Malların, məmulatların və kənd təsərrüfatı məhsullarının satışı üçün fiziki şəxslərdən birdəfəlik rüsumun alınması məqsədi ilə bazarlar, yarmarkalar və xüsusi olaraq satış üçün ayrılmış digər yerlər ərazilər üzrə aşağıdakı dərəcələrə aid edilsin:

• Bakı şəhərində yerləşən obyektlər, habelə Gəncə və Sumqayıt şəhərlərinin mərkəzinə və mərkəzdən kənara aid edilmiş ərazilərdə yerləşənlər 1-ci dərəcəyə;
• Naxçıvan, Mingəçevir, Şəki, Lənkəran, Yevlax, Əli Bayramlı, Naftalan şəhərləri, habelə Sumqayıt və Gəncə şəhərlərinin şəhərətrafı əraziləri—2-ci dərəcəyə;
• Qalan ərazilərdə—3-cü dərəcəyə.»

2. «Azərbaycan Respublikası Nazirlər Kabinetinin 1995-ci il 16 iyun tarixli 148 nömrəli «Bazarlarda, yarmarkalarda və xüsusi olaraq satış üçün ayrılmış digər yerlərdə malların, məmulatların və kənd təsərrüfatı məhsullarının satışını həyata keçirən fiziki şəxslərdən birdəfəlik rüsumun dərəcələri haqqında» qərarına dəyişikliklər edilməsi barədə» Azərbaycan Respublikası Nazirlər Kabinetinin 1996-cı il 9 dekabr tarixli 170 nömrəli qərarının 2-ci abzası aşağıdakı redaksiyada verilsin:

• «Lotokdan, piştaxtadan, arabadan, stoldan və yerdən satış üçün: 1-ci dərəcə üzrə—1000 manat, 2-ci dərəcə üzrə 800 manat, 3-cü dərəcə üzrə 500 manat;»

Azərbaycan Respublikasının Baş naziri

A. RASİ-ZADƏ.

«Azərbaycan Respublikasının Qanunvericilik Toplusu»nda dərc edilmişdir (28 fevral 2001-ci il, ¹ 2, maddə 115) («AzerSoft»).

20 aprel 2005-ci il tarixli, 72 nömrəli qərara əsasən qüvvədən düşmüşdür («AzerSoft»).