Azərbaycan Respublikasının Yanacaq və Energetika Nazirliyi haqqında Əsasnamənin təsdiq edilməsi barədə Azərbaycan Respublikası Prezidentinin Fərmanı

Azərbaycan Respublikasının Yanacaq və Energetika Nazirliyi haqqında Əsasnamənin təsdiq edilməsi barədə

Azərbaycan Respublikası Prezidentinin Fərmanı

Azərbaycan Respublikasının Yanacaq və Energetika Nazirliyinin fəaliyyətini təmin etmək məqsədi ilə qərara alıram:

1. Azərbaycan Respublikasının Yanacaq və Energetika Nazirliyi haqqında Əsasnamə təsdiq edilsin (əlavə olunur).

2. Azərbaycan Respublikasının Nazirlər Kabineti:

on beş gün müddətində Azərbaycan Respublikasının Yanacaq və Energetika Nazirliyinin xərclər smetasını və işçilərin say həddini təsdiq etsin;
bu Fərmandan irəli gələn digər məsələləri həll etsin.

3. Bu Fərman dərc olunduğu gündən qüvvəyə minir.

Azərbaycan Respublikasının Prezidenti

Heydər ƏLİYEV

Bakı şəhəri, 6 sentyabr 2001-ci il

№ 575

«Azərbaycan» qəzetində dərc edilmişdir(7 sentyabr 2001-ci il, № 204) («AzerSoft»).

«Azərbaycan Respublikasının Qanunvericilik Toplusu»nda dərc edilmişdir (30 sentyabr 2001-ci il, № 9, maddə 590) («AzerSoft»).

23 oktyabr 2003-cü il tarixli, 980 nömrəli Fərmana əsasən əlavə və dəyişikliklərlə(«AzerSoft»).

Azərbaycan Respublikası Prezidentinin 2001-ci il
06 sentyabr tarixli, 575 nömrəli Fərmanı ilə
təsdiq edilmişdir

Azərbaycan Respublikasının Yanacaq və Energetika Nazirliyi haqqında
Əsasnamə

I. Ümumi müddəalar

1. Azərbaycan Respublikasının Yanacaq və Energetika Nazirliyi (bundan sonra —Nazirlik ) Azərbaycan Respublikası Prezidentinin 2001-ci il 18 aprel tarixli 458 nömrəli Fərmanı ilə yaradılmış və Azərbaycan Respublikasının yanacaq-energetika kompleksində (neft və qaz hasilatı, nəqli və emalı, elektrik və istilik enerjisi istehsalı, qaz təchizatı) dövlət siyasətini formalaşdıran və həyata keçirən mərkəzi icra hakimiyyəti orqanıdır.

2. Nazirlik öz fəaliyyətində Azərbaycan Respublikasının Konstitusiyasını, Azərbaycan Respublikasının qanunlarını, Azərbaycan Respublikası Prezidentinin fərman və sərəncamlarını, Azərbaycan Respublikası Nazirlər Kabinetinin qərar və sərəncamlarını və bu Əsasnaməni rəhbər tutur.

3. Nazirlik müstəqil balansa, üzərində Azərbaycan Respublikasının dövlət gerbinin təsviri və öz adı olan möhürə, müvafiq ştamplara, blanklara və bank hesablarına malikdir.

4. Nazirliyin fəaliyyətinin maliyyələşdirilməsi dövlət büdcəsinin vəsaiti hesabına həyata keçirilir.

5. Nazirlik Bakı şəhərində yerləşir.

II. Nazirliyin əsas vəzifələri

6. Nazirliyin əsas vəzifələri aşağıdakılardır:

6.1. Azərbaycan Respublikasının yanacaq və energetika sahəsində dövlət siyasətini formalaşdırmaq və onun həyata keçirilməsini təmin etmək;

6.2. iqtisadiyyatın və əhalinin yanacağa və enerjiyə olan tələbatının ödənilməsinə yönəldilən tədbirlər həyata keçirtmək;

6.3. Azərbaycan Respublikasında enerji ehtiyatlarından səmərəli istifadə olunmasına nəzarət etmək, bu sahədə dövlətin maraqlarının qorunmasını təmin etmək;

6.4. Yanacaq-energetika kompleksində beynəlxalq əməkdaşlığın inkişafını və bu sahəyə xarici sərmayələrin cəlb edilməsini təmin edən tədbirlər həyata keçirmək;

6.5. Azərbaycan Respublikasının qanunvericiliyi ilə Nazirliyə həvalə olunmuş digər vəzifələri yerinə yetirmək.

III. Nazirliyin funksiyaları

7. Nazirlik bu Əsasnamə ilə müəyyən edilmiş vəzifələrə uyğun olaraq aşağıdakı funksiyaları həyata keçirir:

7.1. Azərbaycan Respublikasının Yanacaq — Enerji Balansını tərtib edir və aidiyyatı orqanlarla birlikdə onun yerinə yetirilməsi üçün tədbirlər görür;

7.2. Yanacaq-energetika kompleksinin inkişafının əsas istiqamətlərini, ayrı-ayrı enerjidaşıyıcılarının istehsalının və istehlakının proqnoz göstəricilərini hazırlayır, onları aidiyyatı orqanlara təqdim edir və bu sahədə həyata keçirilən tədbirlərdə iştirak edir;

7.3. Azərbaycan Respublikasının enerji təhlükəsizliyinin təmin edilməsi tədbirlərinin hazırlanmasında və bu sahədə işlərin təşkilində iştirak edir;

7.4. Dövlət büdcəsi vəsaiti hesabına maliyyələşən müəssisələr üzrə enerji daşıyıcılarının istehlak limitlərinin müəyyən olunmasında iştirak edir;

7.5. Yanacaq-energetika kompleksinin ayrı-ayrı sahələrinin inkişafı üçün tələb olunan əsaslı vəsait qoyuluşu proqramlarının hazırlanmasında iştirak edir;

7.6. Yanacaq ve energetika kompleksinin strukturunun təkmilləşdirilməsinə dair müvafiq icra hakimiyyəti orqanları ilə birlikdə tədbirlər hazırlayır və qanunvericiliyə uyğun olaraq həyata keçirir;

7.7. Yanacaq-energetika kompleksi müəssisələrinin fəaliyyətinin iqtisadi tənzimləmə mexanizminin təkmilləşdirilməsinə dair təkliflər verir;

7.8. Yanacaq-energetika sahəsində fəaliyyət göstərən dövlət müəssisələrinin fəaliyyətinin qanunvericiliyə uyğun olaraq tənzimlənməsini həyata keçirir;

7.9. Öz səlahiyyətləri çərçivəsində yanacaq-energetika kompleksinə daxil olan müəssisələrin müəssisələrarası fəaliyyətini əlaqələndirir;

7.10. Yanacaq-energetika kompleksi müəssisələrinin iqtisadi və maliyyə vəziyyətini təhlil edir və onların fəaliyyətinin səmərəliliyinin yüksəldilməsi barədə təklif və məsləhətlər verir;

7.11. Yanacaq-energetika kompleksinə daxil olan və nizamnamə kapitalında dövlətin payı olan müəssisələrdə dövlətin maraqlarını təmsil edir və öz səlahiyyətləri daxilində onların fəaliyyətinə nəzarət edir;

7.12. Öz səlahiyyətləri daxilində müvafiq dövlət orqanları ilə birlikdə yanacaq-energetika kompleksinin təbii inhisar subyektlərinin fəaliyyətinin dövlət tənzimlənməsində iştirak edir;

7.13. Yanacaq-energetika kompleksi sahələrində iqtisadi münasibətləri tənzimləyən normativ hüquqi aktlara dair təkliflər hazırlayır, onların razılaşdırılmasında iştirak edir;

7.14. Nazirliyin səlahiyyətlərinə aid olan məsələlər üzrə normativ hüquqi aktları və sahə standartlarını hazırlayıb təsdiq edir, onların icrasına nəzarət edir;

7.15. Yanacaq-energetika kompleksinə daxil olan dövlət müəssisələrinin özəlləşdirilməsinə dair komissiyaların işində iştirak edir, zəruri hallarda müəssisələrin özəlləşdirilməsinə dair məhdudiyyətlər barədə təkliflər verir;

7.16. Yanacaq-energetika kompleksi üçün kadrların hazırlanması və onların ixtisaslarının artırılması üzrə müvafiq tədbirlər görür;

7.17. Müvafiq icra hakimiyyəti orqanları ilə birlikdə enerjiyə qənaət və ekoloji təhlükəsizliyin təmin edilməsi sahəsində tədbirlər hazırlayır, enerjidən istifadənin səmərəliliyinin artırılması üzrə işlərin əlaqələndirilməsini həyata keçirir;

7.18. Yanacaq-energetika kompleksinə daxil olan hidrotexniki qurğuların təhlükəsizliyinə dair dövlət nəzarətini həyata keçirir;

7.19. Yanacaq-energetika kompleksinin idarə olunması prosesində müasir telekommunikasiya və informasiya vasitələrindən geniş istifadə edilməsini təmin edir;

7.20. Yanacaq-energetika kompleksində texnoloji, texniki-iqtisadi, maliyyə, sosial, ekoloji və digər məlumatların kompüter bazasının mərkəzi sistemini yaradır və onun işləməsinə nəzarət edir;

7.21. Yanacaq-energetika kompleksində elmi-texniki siyasətin prioritet istiqamətlərini müəyyən edir və həyata keçirilməsinə nəzarət edir;

7.22. Yanacaq-energetika kompleksində fəaliyyət növlərinə lisenziya verilməsini səlahiyyətləri daxilində həyata keçirir, lisenziyaların şərtlərinə əməl olunmasına nəzarət edir, onların ləğv edilməsi, dayandırılması və ya məhdudlaşdırılması barədə qanunvericiliyə uyğun olaraq qərarlar qəbul edir;

7.23. Mülkiyyət formasından asılı olmayaraq, karbohidrogen yataqlarının işlənməsi üzrə texniki və texnoloji layihə sənədlərini razılaşdırır və layihələrin xüsusi icazələrə uyğun olaraq həyata keçirilməsinə nəzarət edir;

7.24. Karbohidrogen ehtiyatlarının müəyyən edilməsi üçün keçirilən dövlət ekspertizasında iştirak edir;

7.25. Yanacaq-energetika kompleksi obyektlərinin inşası, yenidən qurulması və texniki baxımdan müasirləşdirilməsinin texniki-iqtisadi göstəriciləri və layihə-smeta sənədlərinin ekspertizasının keçirilməsini təmin edir;

7.26. Yerin təkinin geoloji öyrənilməsi, neft və qaz sənayesinin mineral-xammal bazasının bərpası və istifadəsi sahəsində dövlət proqramlarının hazırlanmasını təşkil edir və onları müvafiq dövlət orqanları ilə razılaşdırır.

7.27. Səlahiyyətləri çərçivəsində yanacaq-energetika kompleksində əməyin mühafizəsi haqqında qaydalar və əmək şəraitinin yaxşılaşdırılması üzrə məqsədli proqramlar hazırlayır, onlara əməl olunmasına nəzarət edir;

7.28. Yanacaq-energetika kompleksi obyektlərində fövqəladə vəziyyətlərin qarşısının alınması və nəticələrinin aradan qaldırılması sahəsində tədbirlərin həyata keçirilməsində iştirak edir;

7.29. Yanacaq-energetika kompleksi müəssisələrinin qəzasız istismarının təmin edilməsinə yönəldilmiş tədbirlərdə və yanğına qarşı profilaktika işlərinin təşkil edilməsində iştirak edir;

7.30. Yanacaq-energetika kompleksinin təhlükəli istehsal obyektlərində istehsal nəzarətinin aparılmasına və ətraf mühitə mənfi təsir göstərən tullantıların azaldılmasına yönəldilmiş tədbirlərin həyata keçirilməsində iştirak edir;

7.31. Dövlət sirrinin, məxfi məlumatın qorunmasını təmin edir, xüsusi rabitə əlaqəsini həyata keçirir, səfərbərlik hazırlığını təşkil edir, yanacaq-energetika kompleksi obyektlərinin mülki müdafiəsi sahəsində müəyyən olunmuş səlahiyyətləri icra edir, metodik göstərişlər verir;

7.32. Azərbaycan Respublikasının xarici iqtisadi siyasətinin yanacaq-energetika kompleksinə aid olan məsələləri üzrə inkişaf konsepsiyasının formalaşdırılmasında iştirak edir;

7.33. Yanacaq-energetika kompleksi sahələrində əməkdaşlığa dair dövlətlərarası sazişlərin hazırlanmasında iştirak edir, səlahiyyətləri daxilində onlardan irəli gələn müvafiq öhdəliklərin yerinə yetirilməsini təşkil edir və əlaqələndirir;

7.34. Yanacaq-energetika kompleksinə aidiyyatı olan məsələlər üzrə beynəlxalq iqtisadi və enerji təşkilatlarının işində, yanacaq-energetika kompleksinə kreditlərin cəlb edilməsi sahəsində beynəlxalq və milli maliyyə və kredit təşkilatları ilə qarşılıqlı əlaqələrdə iştirak edir;

7.35. Yanacaq-enerji kompleksinə sərmayə qoyuluşu cəlb edilməsi üçün əlverişli mühit yaradılması məqsədilə müvafiq tədbirlər işləyib hazırlayır və həyata keçirir;

7.36. Yanacaq-enerji kompleksinə daxil olan müəssisələr tərəfindən dövlət zəmanəti ilə alınmış kreditlərin vaxtında qaytarılmasını təmin etmək məqsədilə digər mərkəzi icra hakimiyyəti orqanları ilə birlikdə müvafiq tədbirlər həyata keçirir;

7.37. Azərbaycan Respublikası Prezidentinin tapşırıqlarına uyğun olaraq karbohidrogen ehtiyatlarının hasilatın pay bölgüsü və ya digər şərtlərə uyğun olaraq işlənməsi barədə sazişlərin layihələrini hazırlayır, bu sazişlər üzrə danışıqlar aparır, onları müəyyən olunmuş qaydada imzalayır, bağlanmış sazişlərin həyata keçirilməsinə nəzarət edir;

7.38. Azərbaycan Respublikası Prezidentinin tapşırıqlarına uyğun olaraq indiyədək imzalanmış və qanunvericiliklə müəyyən edilmiş qaydada ratifikasiya olunmuş hasilatın pay bölgüsünə dair kontraktlarda dövlətin səlahiyyətlərinə aid olan məsələlər üzrə funksiyaları həyata keçirir, o cümlədən həmin kontraktlara əsasən yaradılan rəhbər orqanların (komitələrin və bu kimi digər qurumların) tərkibində Azərbaycan tərəfini təmsil edən şəxsləri təyin edir və ya dəyişir, müvafiq nəzarət funksiyalarını həyata keçirir;

7.39. Yanacaq-energetika kompleksinin məhsul və xidmətlərinin xarici bazara çıxarılmasına şərait yaradılmasına kömək göstərir;

7.40. Müvafiq icra hakimiyyəti orqanları ilə birlikdə enerji daşıyıcıları istehsalçılarının müəyyən olunmuş qaydada nəqliyyat-kommunikasiya sistemlərinə qoşulmasının tənzimlənməsində iştirak edir;

7.41. Azərbaycan Respublikasının qanunvericiliyi ilə Nazirliyə həvalə olunmuş digər funksiyaları yerinə yetirir.