Bakı şəhəri, 13 fevral 1995-ci il

Azərbaycan Respublikası Nazirlər Kabineti qərara alır:

1. Azərbaycan Respublikası dövlət sərhədinin buraxılış-keçid məntəqələrində Sərhədyanı bazarların yaradılması və fəaliyyəti Qaydaları təsdiq edilsin (əlavə olunur).

2. Ticarət Nazirliyi, İqtisadiyyat Nazirliyi, Xarici İqtisadi Əlaqələr Nazirliyi, Dövlət Gömrük Komitəsi, Dövlət Sərhəd Xidməti, Naxçıvan Muxtar Respublikasının Nazirlər Kabineti, Yerli icra hakimiyyəti orqanları və digər əlaqədar təşkilatlar Sərhədyanı bazarın normal fəaliyyətinin təmin olunması üçün müvafiq tədbirlər görsünlər.

3. Bu qərarın icrasına nəzarət Nazirlər Kabineti İşlər İdarəsinin ticarət və pullu xidmətlər və xarici iqtisadi əlaqələr şöbələrinə tapşırılsın.

Baş nazirin vəzifəsini icra edən

F. QULİYEV

15 iyul 1996-cı il tarixli, 95 saylı; 31 iyul 1998-cı il tarixli, 162 nömrəli; 29 yanvar 2001-ci il tarixli, 25 nömrəli; 2 iyun 2003-cü il tarixli, 73 nömrəli qərarlara əsasən əlavə və dəyişikliklərlə.(«AzerSoft»).

Azərbaycan Respublikası Nazirlər Kabinetinin
1995-ci il 13 fevral tarixli, 26 nömrəli qərarı ilə
təsdiq edilmişdir.

1. Bu Qaydalar Azərbaycan Respublikası dövlət sərhədinin buraxılış-keçid məntəqəsində Sərhədyanı bazarın (bundan sonra «bazar» adlanacaq) təşkili və fəaliyyətinin hüquqi və iqtisadi əsaslarını müəyyən edir.

Bazar qanunvericiliklə nəzərdə tutulmuş qaydada yaradılır.

Bazar Ticarət Nazirliyi tərəfindən təsdiq edilmiş Nizamnamə əsasında fəaliyyət göstərir.

2. Bazar hüquqi şəxs olmaqla təsərrüfat hesabı, özünü maliyyələşdirmə prinsipləri əsasında fəaliyyət göstərən dövlət müəssisəsidir, müstəqil balansa və əmlaka malikdir.

3. Bazarın balansında olan əsas və dövriyyə vəsaitləri, əmlak, ehtiyatlar, maddi-əmtəə dəyərləri dövlət mülkiyyəti olub onun tam təsərrüfat idarəçiliyindədir.

4. Bazar dövlətin, dövlət isə Bazarın öhdəlikləri üzrə məsuliyyət daşımır.

Bazar öz öhdəlikləri üçün üzərinə cərimə qoyula bilən əmlakı ilə məsuliyyət daşıyır.

5. Bazarın öz adı yazılmış möhürü, firma blankları, ştampı və digər rekvizitləri olur.

6. Bazarın əsas məqsədi — Azərbaycan Respublikası ilə Müvafiq qonşu dövlət arasında ticarət-iqtisadi əlaqələri sadələşdirməklə, bu əlaqələrin genişləndirilməsi, əhalinin ərzaq məhsullarına və digər mallara (iş və xidmətlərə) olan tələbatının ödənilməsi işinə xidmət etmək, qanunvericiliklə müəyyən olunmuş qaydada ticarət fəaliyyətini həyata keçirmək məqsədilə bazarın xidmətlərindən istifadə edən hüquqi və fiziki şəxslərin zəruri sənədlərlə təmin edilməsinə, onlar tərəfindən Azərbaycan Respublikası qanunvericiliyinə riayət olunmasına nəzarət etməkdir.

7. Bazar öz vəzifələrini həyata keçirərkən dövlət orqanları, müəssisələr, işgüzar adamlar və xarici firmalarla qarşılıqlı əlaqələr yaradır, normal fəaliyyətini təmin etmək üçün müstəqil olaraq müqavilələr bağlayır. Bazar hüquqi şəxs kimi qanunvericiliklə qadağan edilməyən bütün fəaliyyət növləri ilə məşğul ola bilər və bazarın fəaliyyətini təmin etmək və normal şərait yaratmaq hüququna malikdir.

8. Bazarın iş günləri və onun həddi yerli icra hakimiyyəti orqanları ilə razılaşdırılmaqla, bazarın direktoru tərəfindən müəyyən edilir.

9. Bazarın xidmətlərindən istifadə edən hüquqi və fiziki şəxslər daxilolma və icarə haqqı, habelə bazar işçilərinin göstərdikləri xidmətlərə görə haqq ödəyirlər.

10. Bazarda malların satışı Azərbaycan Respublikasının qanunvericiliyinə uyğun olaraq aparılır.

Sərhədyanı bazar ərazisini əhatə edən Azərbaycan Respublikasının qonşu rayonlarının hüquqi və fiziki şəxsləri həmin bazarda alqı-satqı əməliyyatlarını apara bilərlər.

11. Azərbaycan Respublikasının həmhüdud dövlətlərlə beynəlxalq müqavilələrində müəyyən olunmuş müvafiq sərhədyanı ərazidə yerli ehtiyacların ödənilməsi üçün sərhədyanı ticarət çərçivəsində illik mal dövriyyəsinin həcmi Azərbaycan Respublikası Ticarət Nazirliyinin həmhüdud ölkələrin müvafiq qurumları ilə imzaladığı protokollarla müəyyən edilir.

Hüquqi şəxslər və hüquqi şəxs yaratmadan sahibkarlıq fəaliyyəti ilə məşğul olan fiziki şəxslər tərəfindən malların bazarın ərazisindən çıxarılması və bazara gətirilməsi, habelə fiziki şəxslər tərəfindən istehsalat və ya kommersiya fəaliyyəti üçün nəzərdə tutulmayan malların sərhədyanı bazarın ərazisinə gətirilməsi və bazardan çıxarılması mövcud qanunvericiliklə nəzərdə tutulmuş qaydada həyata keçirilir.

12. Bazarın ticarət xidmətindən istifadə edən hüquqi və fiziki şəxslərlə Bazar arasında yaranan mübahisələrə məhkəmə və ya arbitraj məhkəməsində baxılır.

13. Bazarın ərazisinə daxilolma və orada alqı- satqı tərtib olunmuş sənədlər əsasında həyata keçirilir (əlavə olunur).

14. Bazarın əmlakı onun əməli idarəçiliyinə verilmiş əsas vəsaitdən, əsas təsərrüfat fəaliyyəti nəticəsində qazanılmış mənfəətdən, habelə qanunla yol verilən başqa mənbələrdən alınan gəlirlərdən ibarətdir.

15. Bazar öz fəaliyyəti nəticəsində əldə etdiyi mənfəətindən məcburi ödənişləri ödədikdən sonra aşağıdakı fondları yaradır:

• sosial-iqtisadi inkişaf fondu;
• əmək haqqı və mükafat fondu;
• sığorta fondu.

16. Bazarın fəaliyyətinə nəzarət Azərbaycan Respublikası qanunvericiliyi ilə müəyyən olunmuş qaydada həyata keçirilir.

17. Bazar müəyyən olunmuş qaydada dövrü və illik maliyyə-mühasibat hesablarını müvafiq maliyyə, vergi və statistika orqanlarına təqdim edir.

18. Bazarın maliyyə-təsərrüfat fəaliyyətinin yoxlanılması dövlət maliyyə, vergi və qanunla müəyyən olunmuş qaydada digər səlahiyyətli orqanlar tərəfindən həyata keçirilir.

19. Bazara yerli rayon icra hakimiyyəti başçısının rəyi nəzərə alınmaqla Azərbaycan Respublikası ticarət nazirinin əmri ilə təyin olunan direktor rəhbərlik edir

20. Direktorun müavinlərini vəzifəyə bazarın direktoru təyin və vəzifədən azar edir, bazarın digər işçilərinin seçilib yerləşdirilməsini həyata keçirir, digər struktur vahidlərinin rəhbərlərini vəzifəyə təyin və vəzifədən azad edir.

21. Direktor bazarın vəzifələrinin yerinə yetirilməsi üçün məsuliyyət daşıyır. Direktor bazar adından etibarnaməsiz hərəkət edir, respublika daxilində və xaricində bütün müəssisə və təşkilatlarla münasibətlərdə onun mənafeyini təmsil edir, müqavilələr bağlayır, etibarnamələr verir, banklarda hesablar açır, vəsaitləri idarə etmək hüququndan istifadə edir, ştat vahidlərini, strukturunu müəyyən və təsdiq edir, öz müavinləri arasında vəzifə bölgüsü aparır, icrası bazarın işçiləri üçün məcburi olan əmr, sərəncam və göstərişlər verir.

22. Direktor bazarın normal fəaliyyətini təmin edir, müvafiq dövlət orqanları ilə əlaqə saxlayır, onlara lazımi hesabatlar təqdim edir və bazarın işinin təkmilləşdirilməsi üçün təkliflər verir.

23. Direktor statistika və maliyyə uçotunu təmin edir, bazara mal gətirənlərin idxalat-ixracat sənədlərinin verilməsini, miqdar, növ, qiymət göstərməklə ixracat və idxalat üzrə statistik uçotun hazırlanmasını, hüquqi və fiziki şəxslərdən müvafiq qaydada yığımların alınmasını təmin edir.

24. Direktor bazar iştirakçilarına müxtəlif növ xidmətin (Bazar daxilində əl arabalarının, təmizlik işlərinin, məişət xidmətlərinin və s.) göstərilməsini, bazarın ehtiyaclarının ödənilməsini, ticarət sövdələrində iştirak edən hüquqi və fiziki şəxslərin qeydiyyatının aparılmasını təmin edir.

25. Direktor bazarda iş rejimini, xidmətlərdən istifadə qaydalarını, daxili əmək intizamı və digər daxili məsələlərin həlli üçün «Bazarın daxili qaydaları»nı təsdiq edir, bu qaydalarla ticarət sövdələrində iştirak edən hüquqi və fiziki şəxslərin tanış olmasını təşkil edir.

26. Bazarın ləğvi və yenidən təşkil edilməsi qanunvericilikdə nəzərdə tutulan qaydada həyata keçirilir.

27. Ləğv olunmanı Ticarət Nazirliyinin təyin etdiyi ləğvetmə komissiyası həyata keçirir.

Azərbaycan Respublikası dövlət sərhədinin
buraxılış-keçid məntəqəsinin
neytral zonasında
Sərhədyanı bazarın Əsasnaməsinə
1 nömrəli əlavə

Xüsusi buraxılış vərəqələri Sərhədyanı bazarın direktorunun məktubu əsasında verilir.

İşlər müdiri

A. HACIYEV.

Azərbaycan Respublikası dövlət sərhədinin
buraxılış-keçid məntəqəsinin
neytral zonasında
Sərhədyanı bazarın Əsasnaməsinə
2 nömrəli əlavə

İşlər müdiri

A. HACIYEV.

Azərbaycan Respublikası dövlət sərhədinin
buraxılış-keçid məntəqəsinin
neytral zonasında
Sərhədyanı bazarın Əsasnaməsinə
3 nömrəli əlavə

İşlər müdiri

A. HACIYEV.

Azərbaycan Respublikası dövlət sərhədinin
buraxılış-keçid məntəqəsinin
neytral zonasında
Sərhədyanı bazarın Əsasnaməsinə
4 nömrəli əlavə

İşlər müdiri

A. HACIYEV.

Azərbaycan Respublikası dövlət sərhədinin
buraxılış-keçid məntəqəsinin
neytral zonasında
Sərhədyanı bazarın Əsasnaməsinə
5 nömrəli əlavə