1.2. Bu Qaydalarda aşağıdakı anlayışlardan istifadə olunur:

• rezident fiziki şəxslər (rezidentlər) – Azərbaycan Respublikasında daimi yaşayış yeri olan, o cümlədən Azərbaycan Respublikası hüdudlarından kənarda müvəqqəti yaşayan fiziki şəxslər;
• qeyri-rezident fiziki şəxslər (qeyri-rezidentlər) – Azərbaycan Respublikası hüdudlarından kənarda daimi yaşayış yeri olan, o cümlədən Azərbaycan Respublikasında müvəqqəti yaşayan fiziki şəxslər;
• ov silahı – vəhşi heyvanların və quşların ovlanması üçün nəzərdə tutulmuş yivli və ya yivsiz lüləli odlu, soyuq, o cümlədən soyuq atıcı və pnevmatik silahdır;

• gömrük məqsədləri üçün lazım olan sənədlərin və məlumatların yoxlanması. Bu sənədlərə gömrük bəyannaməsi, ov silahının əldə edilməsini təsdiq edən sənədlər (hesab-faktura, invoys və s.) və Azərbaycan Respublikası Daxili İşlər Nazirliyinin ov silahının və onun sursatının respublikaya gətirilməsinə verilən icazə sənədinin əsli;
• ov silahının və onun sursatının gömrük yoxlanması;
• ov silahının və onun sursatının uçotu.

3.2. Fiziki şəxslər tərəfindən ümumi dəyəri 1000 ABŞ dollarına ekvivalent və ya çəkisi 50 kiloqramdan artıq olmayan miqdar və dəyər hədləri daxilində Azərbaycan Respublikasının gömrük sərhədindən şəxsi istifadə üçün keçirilən ov silahlarının və onların sursatlarının rəsmiləşdirilməsi gömrük ödənişləri alınmadan, mal vahidinin və ya dəstinin miqdarı və dəyəri qanunvericiliklə müəyyən edilmiş həddi ötdükdə isə xarici-iqtisadi fəaliyyətin tarif və qeyri-tarif tənzimlənməsinə uyğun gömrük ödənişləri alınmaqla sadələşdirilmiş qaydada aparılır.

3.3. Daimi yaşayış məqsədilə Azərbaycan Respublikasına köçüb gələn fiziki şəxslərin bilavasitə özləri və ya müşayiət olunmayan baqajda gətirdikləri ov silahı və onların sursatları Azərbaycan Respublikası DİN-nin icazəsi təqdim edilməklə rəsmiləşdirilir.

3.4. Fiziki şəxslər tərəfindən Azərbaycan Respublikası ərazisinə ov silahı və onun sursatı qanunvericilikdə müəyyən edilmiş miqdarda müvəqqəti gətirilməsinə Azərbaycan Respublikası Daxili İşlər Nazirliyinin müvafiq icazəsi ilə gömrük rəsmiləşdirilməsi həyata keçirilir və icazə sənədinin etibarlılıq müddəti ərzində müvəqqəti gətirilmiş ov silahı respublikadan kənara aparılmalıdır.

3.5. Fiziki şəxslər tərəfindən Azərbaycan Respublikası gömrük ərazisinə gətirilən ov silahlarına və onun sursatlarına Azərbaycan Respublikası Daxili İşlər Nazirliyinin müvafiq icazə sənədi olmadıqda və ya xarici ölkələr tərəfindən silahların və onların sursatlarının Azərbaycan Respublikasına gətirilməsinə verilən icazə sənədi ilə ov silahları və onların sursatları gətirildikdə gömrük nəzarəti altında 2 №-li gömrük arayışı əsasında (qaçaqmalçılıq və gömrük qaydalarının pozulması əlamətləri olmadıqda) məsul saxlanca verilməlidir.

Gömrük bəyannaməsi və 2 №-li gömrük arayışında ov silahının markası, nömrəsi, kalibri göstərilməlidir.

Azərbaycan Respublikası Daxili İşlər Nazirliyinin müvafiq icazə sənədi təqdim olunduqdan sonra tam gömrük rəsmiləşdirilməsi aparılır və həmin ov silahı Azərbaycan Respublikası gömrük ərazisinə buraxılır.

3.6. Azərbaycan Respublikası ərazisinə fiziki şəxslər tərəfindən ov silahı və onun sursatları gətirilərkən Azərbaycan Respublikası DİN-nin verdiyi icazə sənədində, qeydiyyat jurnalında (əlavə №-1) müvafiq qeydlər aparılmalı və şəxsi nömrəli möhürlə təsdiqlənməlidir.

İcazə sənədində gömrük orqanları tərəfindən müvafiq qeydlər aparıldıqdan sonra, icaza sənədinin əsli götürülür və fiziki şəxsə DİN-nə təqdim olunması üçün həmin sənədin foto surəti verilir.

3.7. Azərbaycan Respublikası Daxili İşlər Nazirliyi tərəfindən verilən icazə sənədində göstərilən miqdarda (və ya ondan az) ov silahı və onun sursatları gətirildikdə, icazənin arxa tərəfində gətirilən ov silahının markası, kalibri, nömrəsi, miqdarı, gətirilmə tarixi, ov silahının sursatları gətirildikdə isə – gətirilən sursatın adı, miqdarı və gətirilmə tarixi haqqında qeydlər aparılır. İcazənin etibarlılıq müddəti ərzində ov silahı və onun sursatının gətirilməsinə verilən icazədən ikinci dəfə istifadə olunması qadağandır.

3.8. Azərbaycan Respublikası DİN-nin verdiyi icazə sənədi etibarnamə ilə başqa fiziki və ya hüquqi şəxsə verilə bilməz.

• gömrük nəzarəti üçün sənədlərin və məlumatların yoxlanılması. Bu sənədlərə gömrük bəyannaməsi, ov silahının əldə edilməsini təsdiq edən sənəd (alqı-satqı sənədi, hesab-faktura, invoys və s.), Azərbaycan Respublikası DİN-nin ov silahının Azərbaycan Respublikası ərazisindən çıxarılmasına verilən icazə sənədinin əsli;
• ov silahı və onun sursatının gömrük yoxlanması;
• ov silahı və onun sursatının uçotu.

4.2. Daimi yaşayış məqsədilə Azərbaycan Respublikasından köçüb gedən fiziki şəxslər tərəfindən ov silahı və onun sursatlarının Azərbaycan Respublikası ərazisindən çıxarılması Azərbaycan Respublikası DİN-nin icazəsi əsasında həyata keçirilir.

4.3. Fiziki şəxslər tərəfindən ov silahı və onun sursatlarının Azərbaycan Respublikası ərazisindən çıxarılmasının gömrük rəsmiləşdirilməsi sadələşdirilmiş qaydada gömrük bəyannaməsi yazılmaqla və Azərbaycan Respublikası DİN-nin icazə sənədində və qeydiyyat jurnalında (əlavə № 2) müvafiq qeydlər aparılmaqla həyata keçirilir.

İcazə sənədində gömrük orqanları tərəfindən müvafiq qeydlər aparıldıqdan sonra, icazə sənədinin əsli götürülür və fiziki şəxsə DİN-nə təqdim olunması üçün həmin sənədin surəti verilir.

4.4. Xarici dövlətlərin ərazisində ov və idman yarışlarında iştirak etmək məqsədi üçün fiziki şəxslər tərəfindən ov silahı və onun sursatları Azərbaycan Respublikası DİN-nin icazəsi təqdim edilməklə Azərbaycan Respublikası ərazisindən müvəqqəti aparılmasına (icazə müddəti ərzində geri qaytarmaq şərti ilə) icazə verilir.

4.5. Xarici vətəndaşlar vətəndaşı olduğu dövlətlərin nümayəndəliyinin vəsatətinə əsasən Azərbaycan Respublikası DİN-nin verdiyi icazə sənədi ilə alındığı vaxtdan beş gündən gec olmayaraq Azərbaycan Respublikası ərazisindən kənara aparmaq şərti ilə ov silahı əldə edə bilərlər. Onlar silahın Azərbaycan Respublikasının ərazisindən aparılma müddətini pozarsa həmin silah müsadirə olunur.

4.6. Ov silahının nadir nüsxələri «Xidməti və mülki silah haqqında» Azərbaycan Respublikasının Qanununun tələbləri nəzərə alınmaqla, Azərbaycan Respublikasının qanunvericiliyi ilə müəyyən edilmiş və Azərbaycan Respublikasının Mədəniyyət Nazirliyi tərəfindən mühafizə siyahısına daxil edilmiş mədəniyyət sərvətləri xüsusi rejim əsasında verilmiş mühafizə dərəcəsinə müvafiq surətdə Azərbaycan Respublikası Mədəniyyət Nazirliyinin ixracın mümkünilüyü barədə verdiyi şəhadətnamə Azərbaycan Respublikasının gömrük orqanlarına təqdim edildiyi və komissiyon dəyərinin 100 faizi məbləğində gömrük rüsumu ödənildikdən sonra, mühafizə dərəcəsi verilməmiş ov silahları isə sərbəst surətdə və Azərbaycan Respublikası DİN-nin icazəsi olduqdan sonra Azərbaycan Respublikasının gömrük ərazisindən aparıla bilər.

Əlavə № 1

Əlavə № 2

Azərbaycan Respublikası Mərkəzi İcra Hakimiyyəti Orqanlarının Normativ Hüquqi Aktlarının Bülletenində dərc edilmişdir (2002-ci il, № 8-9, səh. 30) («AzerSoft»).