State Customs Committee

Ölkələrimiz arasında ikitərəfli münasibətlər inkişaf edir

Aprelin 28-də Dövlət Gömrük Komitəsinin sədri, gömrük xidməti general-leytenantı Aydın Əliyev İran İslam Respublikasının ölkəmizdəki fövqəladə və səlahiyyətli səfiri Nasir Həmidi Zareni qəbul etmişdir.
Görüşdə Azərbaycan-İran əlaqələrinin hazırkı durumu, mövcud imkanlar və gələcək perspektivlər barəsində ətraflı fikir mübadiləsi aparılmışdır.
İranlı diplomatı səmimiyyətlə salamlayan Dövlət Gömrük Komitəsinin sədri Aydın Əliyev iki qonşu ölkənin istər siyasi-iqtisadi, istərsə də mədəni sahələrdə əlaqələrindən məmnunluqla söhbət açmış, əməkdaşlığın bundan sonra da davamlı olacağına əminliyini ifadə etmişdir.
Azərbaycan-İran sərhədində-Astara və Biləsuvar gömrük idarələrində aparılan tikinti işləri barədə məlumat verən A.Əliyev ümidvar olduğunu bildirmişdir ki, yenidən qurulacaq, dünya standartlarına cavab verəcək bu cür sərhəd buraxılış məntəqələri iki qonşu ölkə arasında ticari-iqtisadi əlaqələrin inkişafına bir töhfə olacaq.
Son zamanlar istər yerli, istərsə də xarici kütləvi informasiya vasitələrində "böyük rezonans" doğurmuş, lakin sırf texniki məsələlərlə bağlı olan mövzuya da münasibətini bildirən DGK sədri martın 29-da Rusiyadan İrana göndərilən, Azərbaycan-İran sərhədində saxlanılan yükün Nazirlər Kabinetinin 42 saylı qərarı ilə təsdiqlənmiş xüsusi məhsulların siyahısına daxil olduğunu bildirmiş və eyni zamanda, qeyd etmişdir ki, Azərbaycan Nazirlər Kabinetinin 230 saylı qərarına uyğun olaraq həmin malların ölkədən tranzit keçməsi üçün hökumətin xüsusi icazəsi lazımdır.
Səmimi qəbula görə Dövlət Gömrük Komitəsinin sədri Aydın Əliyevə təşəkkür edən səfir Nasir Həmidi Zare İran hökumətinin Azərbaycanla münasibətləri heç bir məhdudiyyət olmadan genişləndirməkdə maraqlı olduğunu və bu barədə verilən tapşırıqlara əsaslanaraq bir diplomat kimi iki ölkə arasında əlaqələrin daha da genişlənməsinə və dərinləşməsinə çalışdığını söyləmişdir. Ölkələrimiz arasında ikitərəfli münasibətlərin inkişaf etdiyini vurğulayan Nasir Həmidi Zare bildirmişdir ki, bütün sahələrdə, o cümlədən, gömrük xidməti sahəsində qarşılıqlı əməkdaşlıq yüksək səviyyədədir. Diplomat Azərbaycan və İran arasında ticarət dövriyyəsinin ildən-ilə artdığını, ötən il bu göstəricinin 600 milyon ABŞ dollarına yaxınlaşdığını diqqətə çatdıraraq, bununla belə, əlaqələrin daha da genişləndirilməsi üçün mümkün imkanlardan maksimum yararlanmağın əhəmiyyətini vurğulamışdır.
Azərbaycan və İran gömrük orqanlarının qarşılıqlı fəaliyyətini müsbət dəyərləndirən səfir sərhəd-gömrük buraxılış məntəqələrində aparılan yenidənqurma işlərindən məmnunluğunu ifadə etmiş, əməkdaşlığın gələcək perspektivlərindən söhbət açmışdır.
DGK sədri Aydın Əliyev gömrük xidmətləri arasında əməkdaşlığın genişləndirilməsi üçün bütün təşəbbüsləri dəstəklədiyini vurğulamış və nəzərə çatdırmışdır ki, mayın 21-23 tarixlərində Dövlət Gömrük Komitəsi BMT Avropa Komissiyasının Nəqliyyat Şöbəsi ilə birgə Ümumdünya Gömrük Təşkilatının Bakıdakı Regional Tədris Mərkəzində İqtisadi Əməkdaşlıq Təşkilatına üzv dövlətlərin gömrük idarələrinin əməkdaşları üçün "BYD seminarı" keçirəcək. Bu tədbirdə İran tərəfinin də yüksək səviyyədə təmsil olunmasını arzulayan DGK sədri Aydın Əliyev, ümumiyyətlə, iki qonşu ölkə arasında əlaqələrin bundan sonra daha da dərinləşəcəyinə əminliyini ifadə etmişdir.

Ölkələrimiz arasında ikitərəfli münasibətlər inkişaf edir

DGK Mətbuat Xidməti